અવળે મારગ - પ્રજારામ રાવળ

કવિ - પ્રજારામ રાવળ


અવળે મારગ હાલો રે, હાલો!
અવળે મારગ બેલી,
આ સુખને વેગળા ઠેલી,
હો બેલી,
અવળે મારગ હાલો.

સવળી ગંગે ખૂબ સર્યા કાંઇ,
ઢળિયા ધરતી ઢાળે;
અબ નવાં પરિયાણ હો વીરાં,
હાલો રે એ મૂળ હેમાળે;
આ મનને મોકળાં મેલી
હો બેલી,
અવળે મારગ હાલો.

જો રે, તિમિંગલ જાય આ ઘેઘૂર,

અવળાં પૂર વચાળે;

વ્હેણનું અદકું જોર વધે તેમ,

અદકું મનમાં મ્હાલે!

આ હેતની વરસે હેલી!

હો બેલી,
અવળે મારગ હાલો.