સુખનું સરનામું – શ્યામલ મુનશી

કવિ, સ્વર, સંગીત - શ્યામલ મુનશી





સુખનું સરનામું આપો;
                  જીવનના કોઈ એક પાના પર એનો નકશો છાપો;
                                                          સુખનું સરનામું આપો.

સૌથી પહેલાં એ સમજાવો ક્યાંથી નીકળવાનું ?
કઈ તરફ આગળ વધવાનું ને ક્યાં ક્યાં વળવાનું ?
                    એના ઘરનો રંગ કયો છે, ક્યાં છે એનો ઝાંપો ?

ચરણ લઈને દોડું સાથે રાખું ખુલ્લી આંખો;
ક્યાંક છુપાયું હોય આભમાં તો ફેલાવું પાંખો;
                ને મળતું હો જો મધદરિયે તો વહેતો મૂકું તરાપો !

કેટલા ગાઉ, જોજન, ફર્લાંગ કહો કેટલું દૂર ?
ડગ માંડું કે મારું છલાંગ, કહો કેટલું દૂર ?
                  મન અને મૃગજળ વચ્ચેનું અંતર કોઈ માપો.

(શબ્દો - રીડ ગુજરાતી)