મોતી વેરાણા ચોકમાં - લોકગીત

આજે નવરાત્રીનો છેલ્લો દિવસ. આ નવ દિવસ આપણે વિવિધ પ્રકારની સ્તુતિ માણિ, પ્રાચીન અને અર્વાચીન ગરબાનો લ્હાવો લીધો. પણ ગરબાનું એક પાસુ હજી સ્પર્શવાનું બાકી છે. ગરબો ફક્ત માતાજીની ભક્તિનું માધ્યમ નથી. આપણા લોકજીવનને પણ તે પ્રતિબિંબ કરે છે. આપણા સામાજિક સંબંધો માન્યતાને તે રજૂ કરે છે. બસ આજે એવો જ એક ગરબો પ્રસ્તુત છે, આપણા જીવનને પ્રતિબિંબિત કરતો.

ફિલ્મ - ચોરીના ફેરા ચાર

લોકગીત

સ્વર - ઉષા મંગેશકર

સંગીત - ગૌરાંગ વ્યાસ

ઓ રાજ, આઠ કુવા ને નવ પાવઠાં રે,

હે મારો પાળ પર લપ્સ્યો પગ રાજ,

હો રાજ, મોતી વેરાણા ચોકમાં રે

હે મારે સસરો સલુણો છે રાજીયો,

હે મારી સાસુડી સમંદર લેહ,

હો રાજ, મોતી વેરાણા ચોકમાં રે

હે મારો જેઠ તે અષાઢીનો મેહુલો રે,

હે મારી જેઠાણી વાદળ વીજ રાજ,

હો રાજ, મોતી વેરાણા ચોકમાં રે

હે મારો દે'ર વાડી માંયનો વાંદરો રે

હે મારી દેરાણી વગડાની વેલ રાજ,

હો રાજ, મોતી વેરાણા ચોકમાં રે

હે મારો,..પિયુજી કળાયેલ મોરલો રે,

હે હું તો ઢળકતી રે ઢેલ રાજ

હો રાજ, મોતી વેરાણા ચોકમાં રે