આ મનપાંચમના મેળામાં - રમેશ પારેખ

કવિ - રમેશ પારેખ
સ્વર - ઉદય મઝમુદાર,રેખા ત્રિવેદી
સંગીત - ઉદય મઝમુદાર






આ મનપાંચમના મેળામાં સૌ જાત લઈને આવ્યા છે
કોઈ આવ્યા છે સપનું લઈને, કોઈ રાત લઈને આવ્યા છે

કોઈ ફુગ્ગાનું ફૂટવું લાવ્યા, કોઈ દોરાનું તૂટવું લાવ્યા
કોઈ અંગત ફાડી ખાનારું એકાંત લઈને આવ્યા છે

કોઈ ઝરમર ઝરમર છાંયડીઓ, કોઈ ઉભડક ઉભડક લાગણીઓ
કોઈ ફાળ, તો કોઈ તંબુની નિરાંત લઈને આવ્યા છે

કોઈ ચશ્માં જેવી આંખોથી વાંચે છે છાપાં વાચાનાં
ને કોઈ અભણ હોઠો જેવી વિસાત લઈને આવ્યા છે

કોઈ ધસમસતા ખાલી ચહેરે, કોઈ ભરચક શ્વાસે ઊમટતા
કોઈ અધકચરા, કોઈ અણોસરા જજબાત લઈને આવ્યા છે


કોઈ લાવ્યા ખિસ્સું અજવાળું, કોઈ લાવ્યા મૂઠી પતંગિયાં
કોઈ લીલીસૂકી આંખોની મિરાત લઈને આવ્યા છે

આ પથ્થર વચ્ચે તરણાનું હિજરાવુ લાવ્યો તું ય, રમેશ
સૌના ખભે સૌ અણિયાળી કોઈ વાત લઈને આવ્યા છે

(શબ્દો - છ અક્ષરનું નામ)