છોકરાને સપનું આવ્યું - તુષાર શુક્લ

કવિ - તુષાર શુક્લ
સ્વર - સોનિક સુથાર
સંગીત - ગૌરાંગ વ્યાસ




છોકરાને સપનું આવ્યું‘તું ગઈ રાતે,
કેટલુંયે સમજાવ્યું છોકરીએ છોકરાને,
ન માને.. ન માને..છોકરો ન માને કોઈ વાતે...!

ચોક્ખી ચણાક સાવ સમજી શકાય એવી છોકરીએ પાડી ‘તી ના !
ગાલ્લાને ઘેર કદી રાણી ન જાય તેમ છોકરાને સમજાવવું આ
લો-ગાર્ડન પાસેથી છૂટાં પડ્યા ‘તા હજુ હમણા તો સાત – સાડા સાતે...!

મળવા છતાંયે જે ના બોલી શક્યો એણે સપનામાં કીધું મલકાતે...
ઓશિકા બદલે ના સપના બદલાય.. મારી રાત હવે ગઈ ગયા ખાતે !
ના પાડી તોયે આ હાલત છે છોકરાની.. જો હા પાડી હોત તો શું થાતે...?

અણગમતું આવે કે મનગમતું આવે એ સપનું છે , સપનાની મરજી
સપનું આંજેલ આંખ સૌથી ના ઉકલે.. એ આંખો નથી રે કોઈ અરજી !
આંખોના સરનામે આવે સુગંધ, એને ઓળખવી પડતી રે જાતે...!

(શબ્દો - અવસર)