રામને ભજ્યા વિના - રવિરામ

કવિ - રવિરામ

સ્વર - મન્ના ડે

રામને ભજ્યા વિના પાર નહિ પામો,
એ જી આ તો ધૂતારાનાં શહેર છે.

જનમ્યો તે દી શું બોલતો બંદા, આજની બોલીમાં ઘણો ફેર છે;
કરી કમાણી તારી ચોપડે ચડશે, લેખા લેવાને ધણી મારો તેડશે..

મોટાઈ તારી રે, બંદા નથી મેલતો, જીરે મોટાઈયું તને વેડશે;
ધન રે દોલતમાં તારું મનડું લોભાણું, પ્રભુના ભજનમાં તારે વેર છે.

ભવસાગરમાં સાચા રે મોતી, છીપે છીપે ઘણો ફેર છે;
બાવા બન્યા તેથી શું રે થયું ભાઈ, પ્યાલે પ્યાલે ઘણો ફેર છે.

કવિ રવિરામ ગુરુ ભાણ પ્રતાપે, દીધા વિના ક્યાંથી પામશો;
દેજો ને લેજો કરજો ભાઈ, અહીંયા તો પ્રભુની ઘણી મહેર છે.