અત્તરિયાને - બાલમુકુંદ દવે

આજે કવિ બાલમુકુંદ દવેની પુણ્યતિથિ છે. માણીયે તેમનું આ અદભૂત ગીત.

કવિ - બાલમુકુંદ દવે



અત્તરિયા !   અત્તરના સોદા ન કીજીએ.
અત્તરિયા ! અત્તર તો એમનેમ દીજીએ.

હાટડી  પૂછીને  કોક  આવી ચડે તો એને
                  પૂમડું આલીને મન રીઝીએ;
દિલની દિલાવરીનો કરીએ વેપાર, ભલે
                  છોગાની ખોટ ખમી લીજીએ.

ઊભે   બજાર   લોક   આવે  હજાર, એની
                     ઝાઝી ના પડપૂછ કીજીએ;
આપણને   વહોરવા આવે, એને તે એલા
                  ગંધને રે બંધ બાંધી લીજીએ.

આઘેથી પગલાંને પરખી લઈએ, ને એના
                         ઉરની આરતને પ્રીછીએ;
માછીડો   ગલ   જેમ   નાખે  છે જલ, એમ
                           નજરુંની ડૂબકી દીજીએ

આછી આછી છાંટ જરી દઈએ છાંટી ને એવો
                           ફાયો સવાયો કરી દીજીએ;
રૂંવે  રૂંવે   સૌરભની    લેર્યું    લહેરાય,   એવાં
                          ઘટડામાં ઘેન ભરી દીજીએ.

અત્તરિયા ! અત્તરના સોદા ન કીજીએ.
અત્તરિયા ! અત્તર તો એમનેમ દીજીએ.

(રીડગુજરાતી)