અમને કોની રે સગાયું આજ સાંભરે ? - દલપત પઢીયાર

ગીત - દલપત પઢિયાર
સ્વર - અમર ભટ્ટ
સંગ્રહ - સ્વરાભિષેક




અમને કોની રે સગાયું આજ સાંભરે ?
ઊંડે તળિયાં તૂટે ને સમદર ઊમટે….
                  કોની રે સગાયું આજ સાંભરે ?


કોઇ પાળ્યું રે બંધાવો ઘાટે ઘોડા દોડાવો,
આઘે લ્હેર્યુંને આંબી કોણ ઊઘડે……
                  કોની રે સગાયું આજ સાંભરે ?


આજે ખોંખારા ઊગે રે સૂની શેરીએ,
ચલમ-તણખા ઊડે રે જૂની ધૂણીએ,
અમને દાદા દેખાય પેલી ડેલીએ…..
                  કોની રે સગાયું આજ સાંભરે ?


માડી વાતું રે વાવે આ ઉજ્જ્ડ ઓટલે,
ખરતાં હાલરડાં ઝૂરે રે અદ્ધર ટોડલે,
ઊંચે મોભને મારગ કોણ ઊતરે…..
                  કોની રે સગાયું આજ સાંભરે ?

કોઇ કૂવા રે ગોડાવો કાંઠે બાગો રોપાવો,
આછા ઓરડિયા લીંપાવો ઝીણી ખાજલિયું પડાવો;
આજે પરસાળ્યું ઢાળી સૌને પીંખીએ….
                  અમને સાચી રે સગાયું પાછી સાંભરે