ભજન કરે તે જીતે - મકરંદ દવે

કવિ - મકરંદ દવે
સ્વર, સંગીત - અમર ભટ્ટ




વજન કરે તે હારે રે મનવા !
                                 ભજન કરે તે જીતે.

તુલસી-દલથી તોલ કરો તો
બને પવન-પરપોટો,
અને હિમાલય મૂકો હેમનો
તો મેરુથી મોટો;

આ ભારે હળવા હરિવરને
મૂલવવો શી રીતે?

રે મનવા ! ભજન કરે તે જીતે.

એક ઘડી તને માંડ મળી છે

આ જીવતરને ઘાટે,

સાચ-ખોટનાં ખાતાં પાડી

એમાં તું નહીં ખાટે;

શેલીશ તું સાગરમોજે કે

પડ્યો રહીશ પછીતે?

રે મનવા ! ભજન કરે તે જીતે.

આવ, હવે તારા ગજ મૂકી,
વજન મૂકીને વરવાં,
નવલખ તાતા નીચે બેઠો
ક્યાં ત્રાજવડે તરવા?

ચૌદ ભુવનનો સ્વામી આવે
ચપટી ધૂળની પ્રીતે
રે મનવા ! ભજન કરે તે જીતે.