નારાયણનું નામ જ લેતાં - નરસિંહ મહેતા

આજે ભારતરત્ન ગાયીકા સુબ્બુલક્ષ્મીની ૯૩મી જન્મતિથી છે. તેમને ખુબ ખુબ શ્રદ્ધાંજલી સાથે માણીયે આ ગીત.

કવિ - નરસિંહ મહેતા
સ્વર - એમ.એસ. સુબ્બુલક્ષ્મી

નારાયણનું નામ જ લેતાં, વારે તેને તજીયે રે;

મનસા વાચા કર્મણા કરીને, લક્ષ્મીવરને ભજીયે રે.

કુળને તજીયે કુટુંબને તજીયે, તજીયે મા ને બાપ રે;
ભગિની-સુત-દારાને તજિયે, જેમ તજે કંચુકી સાપ રે.

પ્રથમ પિતા પ્રહલાદે તજીયો, નવ તજીયું હરિનું નામ રે;
ભરત શત્રુઘ્ને તજી જનેતા, નવ તજીયા શ્રીરામ રે.

ઋષિપત્ની એ શ્રીહરિ કાજે, તજીયા નિજ ભરથાર રે;
તેમાં તેનું કંઈયે ન ગયું, પામી પદારથ ચાર રે.

વ્રજવનિતા વિઠ્ઠલને કાજે, સર્વ તજીને ચાલી રે;
ભણે ‘નરસૈંયો’ વૃન્દાવનમાં, મોહન સાથે મ્હાલી રે.

(શબ્દો - વિકીસોર્સ)