અબોલડાં - જગદિશ જોશી

આજે કવિ જગદિશ જોશીની વર્ષગાંઠ છે. તેમના માનમાં માણીયે આ કાવ્ય.

કવિ - જગદિશ જોશી

તેર વરસના અબોલડા ને બાર વરસની પ્રીત!
આ તે કેવી રીત, સજનવા ! આ તે કેવી રીત?

પગમાં ઉગ્યાં વન અને આંખોમાં સૂકો દરિયો
ગઢના  ઝૂક્યા  ઝરૂખડાને  ખૂંચે  છે  કાંકરિયો;

ભવ આ ભાંગી રાત બની ગઇ દિવસ થકી વંચિતઃ
તેર વરસના અબોલડા ને બાર વરસની પ્રીત.

નહીં વરસેલા મેઘ ને એના પડછાયા ગૂંગળાય;
બંધ હોઠની વાત ક્યારની વીજ થઇ અમળાય;

ખડકી આગળ ખીણ ધૂંધળી, રણમાં રડે પછીતઃ
તેર વરસના અબોલડા ને બાર વરસની પ્રીત!