તમે ભાવે ભજી લ્યો ભગવાન - ભજન

ભજન
સ્વર - લલીતા ઘોડાદ્રા
સંગીત - જીતેશ ગીરી



તમે ભાવે ભજી લ્યો ભગવાન, જીવન થોડું રહ્યું,
કંઇક આત્માનું કરજો કલ્યાણ, જીવન થોડું રહ્યું.

એના દીધેલા કોલ તમે ભૂલી ગયાં,
જૂઠી માયાના મોહમાં ઘેલા થયાં,
ચેતો ચેતો શું ભૂલ્યા છો ભાન.

બાળપણ ને યુવાની માં અડધું ગયું,
નહીં ભક્તિના મારગમાં પગલું ભર્યું,
હવે બાકી છે એમાં દયો ધ્યાન.

પછી ઘડપણમાં ગોવિંદ ભજાશે નહીં,
લોભ વૈભવ ધન, તજાશે નહીં,
બનો આજથી પ્રભુમાં મસ્તાન.

જરા ચેતીને ભક્તિનું ભાથું ભરો,
કંઇક ડર તો પ્રભુજીનો દિલમાં ધરો,
છીએ થોડા દિવસનાં મહેમાન.

બધા આળસમાં દિવસો વીતી જશે,
પછી ઓચિંતુ યમનું તેડું થાશે,
નહીં ચાલે તમારું તોફાન.

એ જ કહેવું આ દાસનું દિલમાં ધરો,
ચિત્ત રાખી ઘન શ્ભાયામને સ્નેહે સમરો,
ઝાલો ઝાલો ભક્તિનું સુકાન.