મુજ અબળાને મોટી - મીરાંબાઇ

કવિ - મીરાંબાઇ

સ્વર - હેમંત ચૌહાણ




મુજ અબળાને મોટી નિરાંત, બાઈ, શામળો ઘરેણું સાચું રે…
વાળી ઘડાવું વિઠ્ઠલવર કેરી, હાર હરિનો મારે હૈયે રે;
ચિત્તમાળા ચતુરભુજ ચૂડલો, શીદ સોની ઘેર જઈએ રે ?

ઝાંઝરિયાં તો જગજીવન કેરાં, કૃષ્ણજી કલ્લાં ને કાંબી રે;
વીછુવા ઘૂઘરા રામનારાયણના, અણવટ અંતરજામી રે

પેટી ઘડાવું પુરુષોત્તમ કેરી, એમાં ત્રિકમ નામનું તાળું રે;
કૂંચી કરાવું કરુણાનંદ કેરી, તેમાં ઘરેણું મારું ઘાલું રે.

સાસરવાસો સજીને બેઠી, હવે નથી કાંઈ કાચું રે;
મીરાં કહે પ્રભુ ગિરિધર નાગર, હરિને ચરણે જાચું રે.