લે બોલ હવે તું - રમેશ પારેખ

ગઇકાલે ર.પાની પુણ્યતિથિ હતી. માણીયે એક ર.પાનું ગીત.

કવિ - રમેશ પારેખ
સ્વર - અમર ભટ્ટ
સંગીત - ક્ષેમુ દીવેટીયા




દરિયામાં હોય એને મોતી કહેવાય છે, તો આંખોમાં હોય તેને શું?
અમે પુછ્યું : લે બોલ હવે તું.

પંખી વછોઈ કોઈ એકલી જગ્યાને તમે માળો કહેશો કે બખોલ?
જોવાતી હોય કોઈ આવ્યાની વાટ ત્યારે ભણકારા વાગે કે ઢોલ?
બોલો સુજાણ, ઊગ્યું મારામાં ઝાડવું કે ઝાડવામાં ઊગી છું હું?
અમે પુછ્યું : લે બોલ, હવે તું.


ઊંચી ઘોડી ને એનો ઊંચો અસવાર : એના મારગ મોટા કે કોલ મોટા?
દરિયો તરવાની હોડ માંડે તો દરિયાનું પાણી જીતે કે પરપોટા?
સૂરજ ન હોય તેવી રાતે ઝીંકાય છે એ તડકાઓ હોય છે કે લૂ?
અમે પુછ્યું : લે બોલ, હવે તું.