માલમ મોટાં હલેસાં તું માર : લોકગીત

આપણી ખામી માટે કોઇ મહેણું મારે તો દુઃખી થવાને બદલે સુધારવા પ્રયત્ન કરીયે તો જીવનમાં સુખી થઇયે. નાનકડી ટકોર પણ જીવનને કેવું સરસ રૂપ આપી શકે! અહીં દિયર-ભાભીની વાત છે. ભાભીએ દિયરને કટાક્ષમાં કહ્યું કે ' એ આળસુ છે, ભાઇની કમાણી પર જલસા કરે છે!' દિયરને મહેણું લાગી જાય છે ને દરિયો ખેડીને કમાવા ને ભાભીને ખુશ કરવાની નેમ લે છે. આ લોકગીતમાં દિયર-ભાભીના મીઠા સંબંધોનું સરસ ચિત્ર પણ ઉપસી આવે છે.

લોકગીત

માલમ મોટાં હલેસાં તું માર,

મારે જાવું મધદરિયાની પાર

મેણું માર્યુ છે મને ભાભલડીએ,

દે'ર આળહનો સરદાર;

હે... ભાઇ કમાય ને ભાઇ ઘોડલાં ખેલવે,

એનો બળ્યુ અવતાર રે...

માલમ મોટાં હલેસાં તું માર.

જાવું છે મારે જાવા બંદરે જ્યાં

લખમીનો નહિ પાર

હે... જાવે ગિયા કોઇ પાછા ન આવે

આવે તો બેડલો પાર રે...

માલમ મોટાં હલેસાં તું માર.

જાવું છે મારે સિંહલદ્વીપમાં,

પરણવા પદમણી નાર;

... મોતીડે પોંખે જો ભાભલડી મારી

તો તો જીવવામાં સાર રે...

માલમ મોટાં હલેસાં તું માર.

કેસરભીનાં તમે જીવો ભાભલડી મારાં

જીવો જીભલડીની ધાર;

હે... મેણાં મારીને મારી મતિ સુધારી

ખોલ્યાં તે મનનાં દ્વાર રે... 

માલમ મોટાં હલેસાં તું માર.

મારે જાવું મધદરિયાની પાર