લ્હેરાય છે રણમાં હરિયાળી - રજની પાલનપુરી

કવિ - રજની પાલનપુરી

સ્વર, સંગીત - મનહર ઉધાસ




લ્હેરાય છે રણમાં હરિયાળી, વેરાનો એ સુંદર લાગે છે,
ને હોય રૂપાળો સથવરો, હર દ્રશ્ય મનોહર લાગે છે.

દિનરાત ફરેબો ખાઇને કંઇ એવી બની ગઇ છે દ્રષ્ટિ,
સંસાર બધો એ મૃગજળથી છલકાતો સમંદર લાગે છે.

ચાખ્યું છે લોહી વસંતોનું, પીધું છે ઝેર નવાયુગનું,
કાંટાથી વધારે ઉપવનમાં, ફૂલોનો હવે ડર લાગે છે.

ઇન્સાન થવાને ઓ ઇશ્વર, વસવું જ પડે છે ધરતી પર,
આ સ્થાન ફકત એ પામે છે, અહીં જેને ઠોકર લાગે છે.

રંગીન કફન આ દુનિયામાં ભાગ્યે જ મળે છે કોઇને
એ માત્ર ઉષાના દિવાના રજનીનું મુકદર લાગે છે.